التكلفة المادية: إمكانياتك المادية عامل اساسى فى اختيار الشقة و على اساسة بيتحدد مساحة الشقة و المنطقة اللى هتسكن فيها و المستوى اللى هتعيش فيه فلازم تحدد امكانياتك المادية هتسمح بالدفع كاش او تقسيط و التقسيط هيبقى مدته اد ايه و قدرتك على توفيره
المساحة: المساحة بتتحدد على حسب حجم اسرتك يعنى محتاج غرفتين او ثلاثة او اكثر و خلى بالك ان الشقق لما تكبر مساحتها بيزيد تمنها و تكلفة التشطيب و توفير الاثاث بتزيد بالتوازى وبردو لازم تعمل حساب المستقبل و امكانية زيادة عدد افراد الاسرة فالشقة لازم تكون مناسبة لاسرتك
المنطقة: لازم تتاكد من توفير الخدمات و المرافق الاساسية فى المنطقة اللى هتسكن فيها زى وجود مستشفى قريبة، صيدلية، سوبر ماركت، مسجد، مدارس و مطاعم.و لازم تعرف ازاى تروح شغلك و المواصلات المتوفرة ليك و ازاى اولادك هيوصلوا مدارسهم و جامعاتهم
تقسيمة الشقة: تقسيمة الشقة و مدى الاستفادة منها لان للاسف فى شقق بتبقى متصممة بطريقة معقدة يصعب استغلالها و لا يساعدك تصميمها على إستغلال المساحة الموجودة او امكانية تغيير التصميم و الاستفادة من المساحة
العقار نفسه: مدى حداثة العقار و متانته، ابعد عن العقار القديم المتهالك ولو هتشترى من شركة لازم تكون لها سابقة اعمال قوية فى البناء
متتسرعش و خد وقتك فى التفكيرقبل الشراء و حاول تبعد عن السماسرة و اهتم بالتفاصيل و زور الشقة مرة و اتنين قبل اتخاذ قرار الشراء النهائى علشان تقدر تقيم مزايا و عيوب الشقة قبل شرائها.
